ସରକାରୀ ଡାକ୍ତରଖାନାରେ ଏବେ ୧୪୫୪ ଡାକ୍ତର ପଦବି ଖାଲି
ଭୁବନେଶ୍ୱର: ଓଡ଼ିଶାର ସରକାରୀ ଡାକ୍ତରଖାନାରେ ଏବେ ୧୪୫୪ଟି ଡାକ୍ତର ପଦବି ଖାଲି ପଡ଼ିଛି । ପାଖାପାଖି ୨ହଜାର ଫାର୍ମାସିଷ୍ଟ ଓ ଲାବ୍ ଟେକ୍ନିସିଆନ୍ ଓ ୧୭ହଜାରରୁ ଅଧିକ ନର୍ସିଂ ଅଫିସର ପଦବି ମଧ୍ୟ ଖାଲି ଅଛି । ୧୦୫ଟି ହୋମିଓପାଥିକ ଡାକ୍ତର ପଦବି ଖାଲି । ଏହି ପଦବି ପୂରଣ ପାଇଁ ସରକାରଙ୍କ ପକ୍ଷରୁ ପଦକ୍ଷେପ ଗ୍ରହଣ କରାଯାଉଛି । ବିଧାନସଭାରେ ସ୍ୱାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀଙ୍କ ପ୍ରଦତ୍ତ ସୂଚନା ମୁତାବକ ରାଜ୍ୟରେ ମୋଟ ୧୦ହଜାର ୭୭୪ଟି ମଞ୍ଜୁରୀପ୍ରାପ୍ତ ଡାକ୍ତର ପଦବି ରହିଛି । ସେଥିମଧ୍ୟରୁ ୯ହଜାର ୩୨୦ଟିରେ ଡାକ୍ତର ଅଛନ୍ତି । ଇତିମଧ୍ୟରେ ରାଜ୍ୟ ସରକାର ନୂଆକରି ୫ହଜାର କନିଷ୍ଠ ଡାକ୍ତର ପଦବି ପ୍ରଥମ ଶ୍ରେଣୀ ପାହ୍ୟାରେ ସୃଷ୍ଟି କରିଛନ୍ତି । ଫଳରେ ମଞ୍ଜୁରୀପ୍ରାପ୍ତ ଡାକ୍ତର ପଦବି ସଂଖ୍ୟା ୧୫ହଜାର ୭୭୪କୁ ବୃଦ୍ଧି ପାଇଛି । ଇତିମଧ୍ୟରେ ୭ହଜାର ୨୭୬ଟି ଖାଲିପଡ଼ିଥିବା ଡାକ୍ତର ପଦବି ପୂରଣ ପାଇଁ ଓଡ଼ିଶା ଲୋକସେବା ଆୟୋଗ ବିଜ୍ଞାପନ ପ୍ରକାଶ କରିଛନ୍ତି ।
ସ୍ୱାସ୍ଥ୍ୟମନ୍ତ୍ରୀ ଶ୍ରୀ ପୂଜାରୀ ସୂଚାଇଛନ୍ତି, ଖାଲିପଡ଼ିଥିବା ୯୨୧ ଲାବ୍ ଟେକ୍ନିସିଆନ୍ ପଦବି ପୂରଣ ଲାଗି ଓଡ଼ିଶା ଅଧସ୍ତନ କର୍ମଚାରୀ ଚୟନ ଆୟୋଗ ପଦକ୍ଷେପ ଆରମ୍ଭ କରିଛନ୍ତି । ସେହିପରି ୮୫୩୧ ନର୍ସିଂ ଅଫିସର ପଦବି ପୂରଣ ପାଇଁ ମଧ୍ୟ ଆୟୋଗକୁ ବିଭାଗ କହିଛି । ରାଜ୍ୟରେ ୫୯୫ଟି ମଞ୍ଜୁରୀପ୍ରାପ୍ତ ହୋମିଓପାଥିକ ଡାକ୍ତର ପଦବି ମଧ୍ୟରୁ ୧୦୫ଟି ପଦବି ଖାଲିପଡ଼ିଛି । ବିଧାୟକ ଗଣେଶ ରାମସିଂ ଖୁଣ୍ଟିଆଙ୍କ ଏକ ପ୍ରଶ୍ନର ଉତ୍ତରରେ ସ୍ୱାସ୍ଥ୍ୟମନ୍ତ୍ରୀ ଏହି ସୂଚନା ପ୍ରଦାନ କରିଛନ୍ତି ।
